കാട്ടുപന്നിക്കൂട്ടം പാവൽ, പയർ കൃഷി ചെയ്തിരുന്ന തടങ്ങളും പന്തലുകളും കുത്തിമറിച്ചു നശിപ്പിച്ചു. സമീപത്തുള്ള നെൽപ്പാടങ്ങളുടെ വരമ്പുകളും കുത്തിമറിച്ചതോടെ കെട്ടി നിർത്തിയിരുന്ന പാടങ്ങളിലെ വെള്ളം ഒഴുകിപ്പോയി. അയിലൂർ തിരുവഴിയാട് പുത്തൻ തറയിൽ ഉദുമാന്റെ വിളവെടുപ്പ് തുടങ്ങിയ പാവൽ, പയർ പന്തലുകളാണ് വലിയതോതിൽ പന്നി കൂട്ടം നശിപ്പിച്ചത്. ചെടികൾ നിൽക്കുന്ന തടങ്ങളും പന്തലുകൾ താങ്ങി നിർത്തിയ കാലുകളും കുത്തിമറിച്ചതോടെ പച്ചക്കറി പന്തൽ പൂർണ്ണമായും നിലം പതിച്ച് വിളവ് ഉൾപ്പെടെ നശിച്ചു. 50000 രൂപയോളം നഷ്ടം കണക്കാക്കുന്നതായി ഉദുമാൻ പറഞ്ഞു. ഉണക്കു ഭീഷണിയെ തുടർന്ന് വെള്ളം കെട്ടിനിർത്തിയ നെൽപ്പാടങ്ങളുടെ വരമ്പുകൾ കുത്തിമറിച്ച് നശിപ്പിച്ചതോടെ നെൽപ്പാടത്ത് വെള്ളം സംഭരിക്കാൻ കഴിയാതായി. കതിര് വന്നു തുടങ്ങുന്നതിനു മുമ്പേയുള്ള പന്നികളുടെ ആക്രമണം നെൽക്കതിർ നിരന്നാൽ രൂക്ഷമാകുമെന്ന് പ്രദേശത്തെ കർഷകർ ആശങ്ക പങ്കുവെച്ചു. കാട്ടുപന്നികളുടെ ആക്രമണം മൂലം നശിച്ച പാവൽ പയർ പന്തൽ.