പശുവിൻ്റെ കുത്തേറ്റ് ചികിത്സയിൽ കഴിഞ്ഞയാൾ മരണപ്പെട്ടു. തിരുവഴിയാട് അരിപ്പാറ വീട്ടിൽ പരേതനായ രാമകൃഷ്ണന്റെ മകൻ അജിത് പ്രസാദ് (60) നാണ് ദാരുണാന്ത്യം സംഭവിച്ചത്. ബുധനാഴ്ചയാണ് പശുവിൻ്റെ കുത്തേറ്റത്. അയൽവാസിയുടെ പശുവിനെ തീറ്റുന്നതിനായി അജിത്ത് പ്രസാദിന്റെ വീട്ടുവളപ്പിൽ കെട്ടിയിട്ടിരുന്നു. പശുവിൻ്റെ സമീപത്തുകൂടെ നടന്നു പോകുന്നതിനിടെയാണ് അജിത് പ്രസാദ് പശുവിന്റെ കുത്തേറ്റത്ത്.
വയറിനു താഴെ കുത്തേറ്റ അജിത് പ്രസാദിനെ ആദ്യം നെന്മാറയിലെ സ്വകാര്യ ആശുപത്രിയിൽ എത്തിച്ചു. വയറിനു താഴെയേറ്റ പരിക്ക് ഗുരുതരമായതിനാൽ തൃശ്ശൂരിലെ സ്വകാര്യ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ചികിത്സയിലിരിക്കെ ശനിയാഴ്ച പുലർച്ചെയാണ് മരിച്ചത്.
തെരഞ്ഞെടുപ്പുകളിൽ രാഷ്ട്രീയ പാർട്ടിക്ക് വേണ്ടി സജീവമായി ചുമരെഴുതുന്ന പെയിൻറിംഗ് ആർട്ടിസ്റ്റ് കൂടിയാണ് അജിത് പ്രസാദ്. പോസ്റ്റ്മോർട്ടത്തിനുശേഷം ഇന്നലെ വൈകിട്ട് അയിലൂർ വാതക സ്മശാനത്തിൽ സംസ്കരിച്ചു. അമ്മ: വത്സല. സഹോദരി: അജിത.