പാലക്കാട് മൂലങ്കോട്ടിലെ ഒരു ഗ്രാമമാകെ വിമാനയാത്രയ്ക്ക് സജ്ജമാകുകയാണ്. വിമാനയാത്ര സ്വപ്നം മാത്രമായിരുന്ന അനവധിപേരുടെ ജീവിതാഭിലാഷം യാഥാർഥ്യമാകുകയാണ്. മൂലങ്കോട് ജനകീയവായന ശാല ആൻഡ് കലാസമിതിയുടെ നേതൃത്വത്തിൽ എല്ലാവർഷവും നടത്താറുള്ള വിനോദയാത്രയുടെ ഭാഗമായാണ് ഇത്തവണ ഒരു ഗ്രാമമാകെ വിമാനത്തിൽ പറക്കുന്നത്. മൂലങ്കോട്, കാരപ്പാടം പ്രദേശത്തെ 128 പേരാണ് വ്യാഴാഴ്ച വിമാനത്തിൽ നെടുമ്പാശേരിയിൽനിന്ന് ബംഗളൂരുവി ലേക്ക് പറക്കുന്നത്. രണ്ടുദിവസം ബംഗളൂരുവിൽ കറങ്ങിയ ശേഷം ഞായറാഴ്ച ട്രെയിനിൽ നാട്ടിൽ തിരിച്ചെത്തുന്ന രീതിയിലാണ് യാത്ര.

ഒമ്പതുമാസമായ എയ്‌വ മോൾ മുതൽ 74 വയസ്സുള്ള രാധ വരെയുണ്ട് സംഘത്തിൽ. 128ൽ 96 പേർ ആദ്യമായാണ് വിമാനത്തിൽ കയറുന്നത്. വായനശാലയുടെ നേതൃത്വത്തിൽ ആഴ്ചതോറും നിശ്ചിത തുക സ്വരൂപിച്ചാണ് യാത്രക്കുള്ള തുക കണ്ടെത്തിയിരുന്നത്.