പാലക്കാട് വടക്കഞ്ചേരിയിൽ സ്കൂട്ടറിൽ പോവുകയായിരുന്ന യുവതിയെ ഇടിച്ചുവീഴ്ത്തി പീഡിപ്പിക്കാൻ ശ്രമിച്ച ബൈക്ക് യാത്രികനായ യുവാവ് അറസ്റ്റിൽ. പട്ടിക്കാട് പൂവഞ്ചിറ സ്വദേശി വിഷ്ണു (25) ആണ് അറസ്റ്റിലായത്. ഇന്നലെ അർധരാത്രിയോടെയാണ് സംഭവം. സ്വകാര്യ സ്‌ഥാപനത്തിലെ ജീവനക്കാരിയായ യുവതി രാത്രി ജോലി കഴിഞ്ഞ് വീട്ടിലേക്കു പോവുന്നതിനിടെ ആയിരുന്നു ആക്രമണ ശ്രമം.യുവതിയെ ബൈക്കിൽ പിന്തുടർന്ന വിഷ്ണു പിന്നിൽ നിന്ന് ഇടിച്ചുവീഴ്ത്തുക ആയിരുന്നു. നിലത്തുവീണ യുവതിക്ക് പരുക്കേറ്റിരുന്നു. പിന്നാലെ ബൈക്കിൽ നിന്നിറങ്ങിയ വിഷ്‌ണു യുവതിയെ ലൈംഗികമായി ഉപദ്രവിക്കാൻ ശ്രമിച്ചു. യുവതി ബഹളം വച്ചതോടെ വിഷ്ണു കടന്നുകളയുകയായിരുന്നു. സിസിടിവിയുടെ പരിശോധനയിൽ നിന്ന് പ്രതിയെ വടക്കഞ്ചേരി പോലീസ് കണ്ടെത്തുകയായിരുന്നു.